مركز المساعدة والمعلومات

رح تلكى أجوبة عن كل الأسئلة المحتملة هنا

الطابعات ثلاثية الأبعاد الموقع والمنتجات المعروضة الطلبات والتوصيل مواد الطباعة ثلاثية الأبعاد Uncategorized

الطابعات ثلاثية الأبعاد

إذا طفت الكهرباء، الطابعة تكمل طباعة؟

كل موديلات طابعات الـ FDM اللي متوفرة بمتجرنا بيها ميزة استكمال الطباعة في حال انقطاع التيار الكهربائي.. بس احنا دائما ننصح باستخدام جهاز UPS ويفضل 1500VA بسبب انو كهربائنا ما مستقرة.. والطابعات بيها محركات خطوية stepper motors واللي هي كلش حساسة لتذبذب التردد .. فاحيانا وبعض الحالات .. بعد ما ترجع الكهرباء تتحرك من مكانها وتخرب النموذج او تشوهه.. كذلك في بعض الحالات اذا استمر انقطاع التيار الكهربائي رح تبرد منصة الطبع heated bed بعض النماذج تفقد التصاقها وتتحرك من مكانها وتخرب عملية الطباعة... لذلك ننصح باستخدام UPS او عاكسة كهرباء.
أما طابعات الـ SLA (الرزين) .. فأساسا ما تستأنف الطباعة لمن ترجع الكهرباء .. فلازم تنربط على جهاز UPS وهي ما تصرف كهرباء هواية .. ممكن UPS صغير..

اگدر أطبع أكثر من لون؟

الطابعة تطبع لو واحد

هو البلاستك مثل الواير يدخل للطابعة وتبدي تطبع .. فهو بس لون واحد ... اكو طابعات تطبع اكثر من لون لونين و 3 او 4 او 5 الوان بس هاي بالعادة غالية وصعبة بالإستخدام ومو عملية لان تستهلك بلاستك هواية .. لان حتى تتبدل اللون لازم تفرغ البلاستك اللي بالتيوب ... وبهيجي حالة رح يروح تلف هواية

بس ممكن تغير البلاستك اثناء الطباعة وتبدل الوان النموذج بعد كذا طبقة من اللون الاول .. شوف هاي الصورة ..

شلون أختار الطابعة ثلاثية الأبعاد اللي تناسبني؟

قبل كل شي وقبل أي خطوة وحتى قبل ما تستفسر لازم تسأل نفسك هذا السؤال:

" اني ليش أريد اشتري طابعة ثلاثية الأبعاد؟" او شنو الغرض اللي اريده الها؟

خلي نجي هسه على احتمالات الاجوبة.

تقنية جديدة وأحب اتعلمها وأحب اواكب.. اذا لازم تفكر بطابعة متوسطة الحجم ( ٢٠ الى ٢٢ سم لطول ضلع المنصة )قليلة الكلفة، ليش؟ لان ٩٠ بالمية من النماذج ثلاثية الأبعاد ممكن تطبعها بطابعة حجم متوسط ونادرا ما رح تحتاج حجم اكبر من الحجم المتوسط.. وليش قليلة الكلفة؟ لان بالبدايات اكيد رح تصير اخطاء وبعض الاحيان تصير اعطال وحتى لا يكون تصليح هاي الاعطال مكلف.. لان اذا اشتريت طابعة غالية او كبيرة وخربت بيها شي رح تحتاج تدفع هواية حتى تصلحها ويجوز ما تحصل الشي اللي تريده او لازم تنتظر هواية. وهم لا تهتم هواية بالمواصفات الثانوية اللي تساعد بعملية الطبع.. مثلا لا تهتم لتسوية المنصة الأوتوماتيكية... لان التسوية اليدوية بسيطة وتكسبك خبرة وما تكلفك فلوس اضافية على سعر الطابعة..

اريد استفاد منها بشكل تجاري وافتح بزنس خاص بيا.. مثل الطباعة بفلوس او طباعة الماكيتات وغيرها... شي حلو وتفكير مرتب.. هسه بعد مو منطقي ولامجدي انو تشتري طابعة متوسطة الحجم وقليلة الكلفة.. ليش؟ لان رح يجوك زبائن عدهم متطلبات خاصة.. حجم نموذج كبير.. قسم يريد دقة عالية.. او سرعة مثلا.. بهيجي حالة انصح بطابعة كبيرة الحجم مثل (٣٠-٣٥ سم لطول ضلع المنصة) وتحتوي على مواصفات مساعدة مثل حساس نفاذ الفلمنت.. حساس تسوية المنصة الأوتوماتيكية.. لان هالمرة رح تحتاج الوقت... وما يفيدك انو تضيع وقت مثلا بضبط التسوية اليدوية للمنصة الكبيرة نسبيا ... ولمن عندك طلبات طباعة كبيرة ما رح تقلق بخصوص نفاذ الفملنت.. او استئناف الطباعة بعد انقطاع الكهرباء.. هاي الامور الثانوية.. هسه صارت مهمة لان رح تكسبك وقت.. والزبون اذا تاخرت عليه رح تخسره.. ولا تهتم لسعر الطابعة اذا كان عملك متقن وتعاملك جيد رح تطلع فلوسها بوقت قصير... اسعار الطباعة مقابل فلوس بشكل عام بيها عدة معايير وعدة طرق لحساب الكلفة قسم على الوزن ( بين ١٠٠ الى ٢٥٠ دينار للغرام) او على الوقت (الساعة بين ٥ الى ١٠ الاف دينار) حسب النموذج

عندي مشاريعي واريد انفذها... اني اسوي مشاريع الكترونية او اسوي قوالب نحت .. تمام بهيجي حالة لازم تقدر الحجم اللي تحتاجه للطباعة لعملك او مشاريعك.. لان الحجم شي اساسي بتحديد السعر .. وايضا مسألة تحديد الوقت اذا كان مهم او لا.. لو كان مهم لازم تتجه للطابعات اللي بيها مواصفات اضافية.. حتى تكون مفيدة الك بتنفيذ اعمالك..

اني احب اسوي مصغرات وتماثيل انمي وغيرها... حلو بس هنا لازم نسولف.. دقة الطابعات ثلاثية الابعاد ما مناسبة للمصغرات .. هواية تفاصيل تضيع.. وغير عن هذا صعوبة طباعة تفاصيل المصغرات بهيجي حالة رح تحتاج شي دقته اعلى.. بده يتوفر عدنا بالعراق وهو طابعات الرزن السائل.. بس لازم تخلي بحسبانك انو الافضل تبدي بطابعة عادية وتتعلم وبعدين تنتقل للرزن.. وخلي ابالك..تقنية الرزن بشكل عام اغلى.. والمواد سامة وخطرة ويجب الحذر بالتعامل وياها.. وهذا كله غير انو حجم الطباعة ما زال صغير بالنسبة للطابعات العادية.. بس بالمقابل رح تحصل دقة ٥ اضعاف اعلى.. لذلك يستخدموها صياغ المجوهرات وتقنيين الاسنان.

فقرة (ما ننصحك)

ما ننصحك تاخذ طابعة عملاقة بالحجم وانت بعدك مبتدئ..
ما ننصحك تاخذ طابعة متعددة الالوان وانت بعدك مبتدئ..
ما ننصحك تاخذ طابعة مستعملة اذا ما تقارن سعرها ويه الجديد بالسوك وفرق المواصفات.. و تشوف بعينك نموذج من الطباعة للطابعة المستعملة...
ما ننصحك تشتري طابعة مبيها اسم موديل او من شركة ما معروفة..
ما ننصحك تشتري طابعة موديل قديم.. رح تتعبك لان التوافق وياها بدا ينقرض وغراضها ما تحصلها بسهولة..

شلون أسوي تسوية المنصة اليدوية بصورة صحيحة؟

من اهم الأمور بالطباعة ثلاثية الأبعاد هو ضبط تسوية المنصة او ال Bed Leveling حتى نحصل على طبقة أولى ممتازة واللي رح تعتبر الاساس لبقية النموذج.. ومثل اساس البيت اذا كانت بيه مشكلة رح يتاثر البيت كله.. كذلك النموذج اذا كانت مشاكل بالطبقة الاولى على الاغلب رح نواجه مشاكل بباقي النموذج واحتمال يفشل..

تسوية المنصة عملية بسيطة بس مهمة.. واللي هي تتمثل بالخطوات التالية:

نضغط Home او Auto Home من إعدادات الطابعة.. حتى الطابعة تفهم انو هذا موقع البداية
نضغط Disable Steppers او نطفي الطابعة... حتى نقدر نتحكم بحركة الهيد والمنصة يدويا..
نخلي الهيد بواحد من اركان الطابعة الاربعة ونخليه على مسافة من الطرف فد ٢ سم بالاتجاهين x و y..
نخلي قصاصة ورقة A4 عادية (لا اثخن ولا اخف) بين النوزل والبيد .. ونحاول نحركها .. ونفر البرغي الجبير تحت الركن هذا حتى نصعد وننزل البيد.. لازم تكون الورقة حرة الحركة وبنفس الوقت نحس باحتكاك الورقة بين النوزل والبيد... هاي المسافة تعتبر مناسبة حتى يطلع الفلمنت من النوزل أثناء الطباعة.. اذا كانت المسافة اقل رح يحشر الفلمنت وما يطلع ويترك اثر على المنصة.. واذا كانت المسافة اكبر ما رح يلتصق الفلمنت بالمنصة ورح ينفصل النموذج وتصير مشاكل.
نفتر على كل الاركان ونكرر نفس العملية.. ومن نكمل ٤ اركان نرجع نفتر مرة او مرتين نكرر الاركان كلها حتى نسوي Fine Tuning لان من نغير ارتفاع ركن الاركان البقية رح تتاثر بشكل بسيط.
للتاكيد انو الامور تمام بالاخير نخلي الهيد بوسط المنصة ونخلي الورقة تحت النوزل والاحتكاك لازم يكون مثل باقي الأركان..

ملاحظات:

البعض تكون الفرة مالته بتسلسل الاركان ١ ثم ٢ ثم ٣ ثم ٤ .. والبعض يسويها ١ ثم ٣ ثم ٢ ثم ٤.. الطريقتين يمشن وماكو فرق
عادي تقدر تعدل على ارتفاع المنصة اثناء طباعة اللير الاول .. طبعا خبرتك شوية رح تلعب دور حتى تعرف شكد تفر البرغي حتى تضبط
خيار ال Skirt بالكيورا (غير انو يفيد بعملية purge الفلمنت من النوزل قبل الطباعة حتى لا تصير فراغات بالنموذج بالطبقة الاولى.. ) فهو ينطي دليل واضح ومؤشر اذا ما كانت التسوية مالتك صحيحة او لا قبل ما تبلش طباعة وتخسر وقت وبلاستك..رح تشوفه الSkirt مكان صاير خفيف ومكان ثخين.. معناها التسوية مو صحيحة.
بين فترة وفترة اتاكد من تسوية المنصة مالتك.. مو شرط بعد كل طباعة.. بس لمن تنقل الطابعة من مكان لمكان او تنقلها بالسيارة... او لمن تواجه صعوبة بفصل النموذج وتحاول تشلعه والبيد يتحرك بايدك.. واذا بدلت البيد مالتك بنوع ثاني.. او اذا بدلت النوزل مالتك.. او اذا فتحت الهيد للتنظيف مثلا.. بكل هاي الحالات لازم تعيد تسوية المنصة.

فيديو سريع يوضح تسوية المنصة

شلون أگدر أستخدم الطابعة؟ شلون أطبع؟

التصميم يا أما
انت تصممه بواحد من برامج تصميم 3D مثل Fusion 360 أو 3D MAX أو Cinama 4D
أو تستخدم أحد المواقع الي تمكنك من تصميم اشياء بسيطة مثل موقع Tinkercad
أو تنزل التصميم جاهز من الانترنت من واحد من المواقع الي تنطي تصاميم مجانية مثل Thingiverse و Cults3d و Myminifactory

.....

في حالة انو انت تعرف تصمم ببرنامج 3D يحتاج تصدر الملف بصيغة STL هاي الصيغة رح نستخدمها ببرنامج اسمه Cura مجاني تكدر تنزله منا

وظيفة هذا البرنامج انو يحول صيغة الSTL الى صيغة G-code وهي الصيغة اللي تفهمها الطابعة ... وبنفس الوقت البرنامج رح يخليك تختار اعدادات الطباعة اللي تريدها مثل السرعة وكمية الحشو الداخلي وغيرها ... ورح يرفق هاي الاعدادات ويه ملف الـ G-code ومن تكمل رح يخزن الملف على SD memory أو (رام) تجي ويه الطابعة مرفقة ... وتنقل هذا الرام من الحاسبة للطابعة وفقط تضغط Print بالطابعة

شلون تعمل الطابعة ثلاثية الأبعاد؟

فكرة عمل الطابعة هو مثل مسدس الصمغ الحراري بس على نوزل صغير جدا .. قطره 0.4 ملم..
الطابعة تذوب البلاستك وتمشي على محورين X و Y وتبرد البلاستك بمرواح اول ما يطلع من النموذج فيجمد بمكانه...

ومن تكمل طبقة تصعد بمحور Z طبقة اللي هي بالعادة 0.2 ملم .. وتبدي تطبع بالطبقة الثانية .. وهذا الى ان تكمل كل الطبقات ويكمل النموذج

شنو أحتاج أشتري ويه الطابعة؟

بشكل اساسي.. تحتاج بس الفلمنت..

ما تحتاج تشتري اي مواد احتياطية او قطع غيار.. الطابعة يجي وياها اهم القطع الاضافية اللي ممكن تحتاج تستبدلها بعد فترة.. مثل النوزل او تيوب الفلمنت..
لازم يتوفر عندك كومبيوتر حتى تنصب عليه برامج التقطيع. ما يفيدك الموبايل.
ما يحتاج تشتري اي برنامج.. برامج التقطيع المشهورة مجانية .. وموجودة بالانترنت وتجي نسخ منها ويه الطابعة.. مثل كيورا Cura
وحدة من الشغلات المهمة انو تشتري حافظة بلاستيكية للفلمنت حتى تحافظ عليه من الرطوبة والأتربة والأوساخ.
جهاز اليو بي اس (UPS) او اذا طابعتك كبيرة تكدر تاخذ عاكسة.. علمود لا تتوقف الطابعة اثناء الطباعة.. صح اغلب الطابعات هسه تستأنف بس اكو مشاكل ترافق عملية الاستئناف وخاصة بكهرباء العراق..

شنو هي الأمور اللي لازم أنتبه عليها قبل ما أشتري فلمنت الطباعة ثلاثية الأبعاد؟

اشتري الفلمنت من مجهز معروف ويعرض اسم ماركة الفلمنت.. لان الشركات المعروفة تنطي شهادات جودة بمنتجاتها.. وحاول تشوف هذا الفملنت موجود بالامازون؟ وشكد سعره بالامازون وقارن الفرق..

لا تشتري فلمنت بدون اسم شركة على العلبة.. بالعادة هذا فلمنت رديء ولا يغرك السعر الرخيص..

لا تشتري فلمنت قديم كلش او ستوك .. لان بعض الاحيان ظروف الخزن تتلف الفلمنت..

قبل ما تشتري الفلمنت افحص الكيس المفرغ من الهوا.. خو ما مثقوب .. لان الرطوبة رح تتلفه.. لا تشتري فلمنت مفتوح ابدا..

اتاكد من اللون الي تريد تشتريه.. شوية موضوع الالوان مزعج لان درجة اللون تختلف من شركة لشركة.. والشركات بالعادة يصنعون تدرج واحد او اثنين او تلاثة لكل لون.. فلا تتصور انو بسهولة تلكا اللون اللي ابالك...واذا عندك مشروع او نموذج كبير تريد تطبعه بلون واحد وتحتاج اكثر من لفة فلمنت.. اتاكد انو الكمية اللي رح تشتريها تكفي قبل ما تبدي.. لان احتمال اذا خلص اللون ورحت تشتري ما تلكاه نفسه..

أحيانا لمن تشتري طابعة مستعملة يعرضون وياها فلمنت مفتوح.. كون حذر من هذا الفلمنت .. صاحب الطابعة يضيف سعر علمود هذا الفلمنت او يعرضه كميزة اضافية ويه الطابعة.. ويكلك ما مستخدم منه هواية.. لا تشتريه ..مشاكله اكثر من سعره.. لان تلكا صاحب الطابعة على الاغلب صارله فتره تاركها وما يطبع بيها وهذا الفلمنت انترك فترة طويلة مفتوح.. الفلمنت المفتوح احتمال يتكسر عندك بالطباعة ويسويلك انسدادات ومشاكل..

شنو هي مجالات إستعمال الطابعات ثلاثية الأبعاد؟

الهندسة المعمارية وطباعة ماكيتات الأبنية
طب الأسنان وطباعة نماذج الأسنان قبل التنفيذ
الطائرات المسيرة وطباعة الطائرات او أجزاءها
التصوير وطباعة الصور بشكل مجسم
الاثار وطباعة الالواح والمجسمات الاثرية
صناعة المجوهرات والمصنوعات الفضية
صناعة بعض الاجزاء الميكانيكية
وغيرها الكثير من الإستخدمات العملية والفنية الأخرى

عندي صورة وأريد اطبعها بالطابعة ثلاثية الأبعاد

حتى تحول الصورة الى مجسم ثلاثي الابعاد.. تحتاج وحدة من 3 أمور ..

يا أما سكنر ثلاثي الأبعاد وهذا متوفر بمتجرنا من خلال هذا القسم..
يا أما يقوم شخص بنحت المجسم بالكومبيوتر بواحد من برامج النحت...
يا أما بإستخدام ستوديو تصوير ثلاثي الأبعاد وهذا يكون بيه عدد كاميرات هواية تاخذ صور من اكثر من زاوية بنفس الوقت

وره ما إشتريت الطابعة، شسوي؟

تركب الطابعة حسب دليل التركيب او فيديو من اليويتيوب من قناة الشركة المصنعة، رأتبع الخطوات بدقة وعناية ولا تجازف بتكهن طريقة التركيب.. حتى لا تصير مشاكل.. انتبه اغلب الطابعات بيها سويتج بالباور سبلاي يغير الفولتية حسب البلد ١١٠ فولت او ٢٢٠ فولت.. المفروص ببقى على ٢٢٠ فولت وما تغيره.
الافضل قبل ما تشتري الطابعة تعرف شلون تشتغل الطابعة وتتعلم عنها.. بس اذا اشتريت..فالمفروض قبل ما تبدي تجرب تطبع ... انو تتعلم عنها سواء عن طريق كورس او يوتيوب.. لا تبدي تطبع قبل ما تتعلم. اكو امور مهمة تحتاج تعرفها وتسويها قبل ما تبلش.
كلش طبيعي بالبداية تخطأ وما تمشي الامور تمام.. اهدأ الطل مر بهاي الامور.. وبمرور الوقت تبدي تتصلح الامور وتحصل نتائج حلوة..
حافظ على الطابعة وخليها بمكان نظيف وبعيد عن الاتربة والغبار.. الطابعة بيها هواية فانات (مراوح) اذا عطلت بسبب التراب رح تخرب اجزاء الطابعة بهذا السبب او ما تطبع بصورة صحيحة.
انتبه من قرب الاطفال عن الطابعة.. حرارة النوزل توصل ٢٦٠ درجة وهاي تسبب حروق عالية.. خليها بعيدة عن الاطفال
الطابعة اربطها بمصدر كهرباء جيد ولاتعتمد على سيار رديء.. لان الطابعة بيها هيترات وبعض الاحيان تسحب تيار ٢ امبير قد لاسامح الله يسوي مشكلة اذا الربط سيء.

الموقع والمنتجات المعروضة

شلون أستخدم الموقع؟

بكل بساطة:

تتصفح منتجات موقعنا من خلال الأقسام اللي إحنا مصنفين المنتجات بداخلها
المنتج اللي يعجبك تضغط (إضافة إلى السلة) وإذا كان بيه أكثر من نوع أو لون تختار اللون اللي تريده وتضيفه للسلة.
بعدها تروح لصفحة السلة وتشوف المنتجات اللي ضفتها وتتأكد منها. وإذا عندك ملاحظة معنية تضيفها بالخانة المخصصة.
بعدها تروح لصفحة الدفع وتخلي معلوماتك (الإيميل والأسم ورقم التلفون والعنوان)

بالصفحة اللي بعدها تختار التوصيل والمحافظة حتى تعرف تكلفة التوصيل
بالصفحة اللي بعدها تتختار طريقة الدفع سواء عند الإستلام أو من خلال البطاقات الإتمانية.

وبعدها تضغط إتمام الطلب

رح يوصلك إيميل بتفاصيل الطلب وتگدر تتابعه من خلال صفحة الحساب وإحنا نرح نشحنه إلك بأسرع وقت.

وإذا إحتاجيت أي مساعدة تگدر تراسلنا أو تستخدم المحادثة بأسفل يمين الصفحة

المنتج اللي أريده غير متوفر، شوكت رح يتوفر؟

إحنا نحاول دائما نوفر كميات بمتجرنا تتماشى مع الطلب، بس مع ذلك، في بعض الأحيان أكو منتجات ممكن تنفذ وتنباع كلها بوقت سريع،
فإذا كان أحد منتجاتنا غير متوفر رح تلكى بنفس صفحة المنتج زر لإعلامك عند توفره، بس خلي إيميلك وموقعنا رح يرسلك إيميل أول ما يرجع يتوفر المنتج، وتگدر تشتريه مباشرةً.

شنو الضمان اللي توفروه ويه المنتج؟

نوفر لزبائنا ضمان حقيقي مع كل منتجاتنا، وبما أنه منتجاتنا من شركات عالمية رصينة فأغلبها تحتوي بداخلها على بطاقة ضمان المصنع، وبالبطاقة توضيح لبنود الضمان.
إحنا نتعهد بالإلتزام ببنود الضمان ضمن الفقرات المحددة والشروط المذكورة، لاتهتم.. رح نتكفل بأجور التوصيل إذا إحتاجينا نرسلك قطعة بديلة وما رح نستوفي أي مبالغ ضمن الضمان.
ملاحظة: عند تطبيق الضمان قد نحتاج نبدل بعض القطع بالمنتج، وقد تكون هاي القطع ما متوفرة بوقت ظهور المشكلة، لذلك رح تنضاف فترة زمينة لحين توفير القطع البديلة من المصدر، ورح نحاول نوفرها بأسرع وقت ممكن.

أگدر أعرف أكثر عن المنتجات اللي توفروها؟

إحنا مختصين بتوفير منتجات التصنيع الحديثة ومنها الطابعات ثلاثية الأبعاد، ودنشغل بجد حتى نوفر أكثر كمية شرح مع كل منتج نعرضه بمتجرنا.

بصفحة كل منتج رح تلكى شرح وصور وفيديوات عن المنتج توضح عمليه ومميزاته وطريقة إستخدامه، وإذا كان شي مو واضح تگدر تراسلنا من خلال الرابط أو المحادثة بأسفل الصفحة

الطلبات والتوصيل

شنو هي أسعار التوصيل

أسعار التوصيل
- بغداد (مركز أو أطراف) 6000 دينار
- البصرة (مركز ) 4000 دينار
- البصرة (أطراف) 5000 دينار
- البصرة (توصيل سريع مركز) 8000 دينار
- كل مدن العراق (مركز أو أطراف) 8000 دينار
- إستلام من المكتب (في البصرة) مجاناً

ملاحظات مهمة
قد تتغير أجور الشحن وفقاً لحجم ووزن الطلب
الأجور أعلاه خاضعة للتغير دون إشعار مسبق.
التوصيل لمحافظة البصرة خلال مدة أقصاها يومان ( العطل الرسمية والمناسبات غير محتسبة).
التوصيل لكافة المحافظات خلال مدة اقصاها 5 أيام ( العطل الرسمية والمناسبات غير محتسبة).
في حالة تسجيل الطلب بعد الساعة 12 مساءاً يشحن الطلب في اليوم التالي ولايحتسب الوقت من ضمن مدة الشحن المذكورة أعلاه.

شلون أگدر أتابع طلبي؟

لمن نشحن طلبك رح تستلم إيميل بيه معلومات عن الطلب ورقم التتبع، بس لطفاُ انتبه يمكن هذا الإيميل يروح للسبام أو لمجلد الإيميلات لمهملة. تأكد من الإيميل إذا كان وصلك أو لا،
ومن خلال تسجيل الدخول لمتجرنا لصفحة الحساب الخاصة بيك تگدر تشوف حالة الطلب.
حالة الطلب ممكن تاخذ وقت الما تتحدث، بسبب تأخير التحديث من شركة التوصيل، بس على الأغلب إذا كان حالة الطلب قيد الشحن فهو رح يوصلك قريباً.

شنو هي سياسة الإسترجاع؟

يهمنا أنو يكون كل زبائنا سعداء لمن يستلمون طلباتهم، للزبون حق رفض إستلام الطلب من مندوب شركة التوصيل لأي سبب وما رح يتحمل الزبون أي أجور كأن تكون غرامات أو أجور توصيل.
الزوبن إله حق فحص المنتجات اللي بالطلب والتأكد من مطابقتها لطلبه قبل ما يدفع المبلغ لمندوب شركة التوصيل أو قبل توقيع محضر الإستلام، على أن لا يصير تلف بالمنتج أو بالعلب الخاصة بالمنتج أثناء الفحص. وإذا كان الزبو ما راضي يگدر يطلب من المندوب يسترجع الطلب وبدون دفع أي مبالغ.

إذا أستلم الزبون الطلب ودفع مبلغ الطلب للمندوب أو وقع محضر الإستلام، بعد غير ممكن إسترجاع الطلب بالوقت الحالي، بهيجي حالة إذا الزبون كان عنده إعتراض على الطلب لازم يراسلنا أو يتصل بينا حتى نقيم الحالة والسبب وبعدها نسوي إجراءات الإستراجاع المناسبة لهذي الحالة، وقد تترتب أجور نقل بهاي الحالة.

طلبي ليهسه ما وصلني! شنو أگدر أسوي؟

قبل كل شي نعتذر جداً لان هذا الشي صار وياك، وبالرغم من أنو إحنا عدنا عقد مع شركة توصيل تعمل بشكل منفصل، بس رح نگدر نتواصل وياهم ونعرف سبب التأخير.
إذا كان عنوان الإستلام هو بأحد الأقضية أو النواحي أو أطراف المدن فالتأخير محتمل بسبب بعد المسافة، أحيانا الطلبات تتأخر بنقاط التفتيش على الطرق الخارجية، لذلك نطلب من حضرتك الإنتظار أكثر لطفاً.
إذا كان رقم هاتف الزبون مغلق أو لايتم الرد، فشركة التوصيل رح تبلغنا وإحنا رح نحاول نتواصل ويه الزبون عن طريق الإيميل أو الفيسبوك أو الإسنتغرام إذا كان متواصل ويانه سابقاُ عن طريقهم، وممكن يتأخر الطلب يوم إضافي الما نتواصل مع الزبون، وإذا ما گدرنا نتواصل مع الزبون بأي شكل رح يعتبر الطلب ملغي.

شگد يطول الطلب يالا يوصلني؟

بالعادة التوصيل يستغرق يومين إلى 4 أيام، أيام الجمعة ما محسوبة،

بعض الطلبات تتأخر يوم إضافي عن المعتاد إذا كانت بالأطراف أو الأقضية والنواحي

الطلبات اللي بيها خدمة تركيب منتج معين أيضا ممكن تستغرق يوم إضافي للتركيب والتجهيز.

إحنا نبذل قصارى جهدنا حتى نوصل طباتكم بأسرع وقت ممكن.

هم تشحنون لخارج العراق؟

للأسف حالياً ما نگدر نشحن لخارج العراق، ودنشتغل بجد على هذا الشي وإن شالله يتوفر بالمستقبل القريب.
بس كملاحظة بعض الدول تفرض رسوم كمرك مختلفة وعدهم قواعد خاصة، لذلك صعب نوفر هذا الشي بالوقت الحالي.

مواد الطباعة ثلاثية الأبعاد

شكد تستهلك الطبعة الوحدة من مواد الطباعة؟ شكد تكفي الرولة الوحدة من الفلمنت؟

إستهلاك مادة الطباعة (البلاستك) تعتمد على اعدادات النموذج اللي تريد تطبعه ..
يعني كمثال فقط : اذا تريد تطبع مكعب طول ضلعه 10 سم واختاريت بالإعدادات انو الحشو الداخلي Infill يكون 0 بالمية يعني فارغ من الداخل يمكن يستهلك 50 غرام من المادة ... واذا ردت تطبع نفس المكعب بس تخلي بالاعدادات حشو داخلي Infill مية بالمية يعني متروس من الداخل يمكن رح يستهلك بلاستك 600 او 700 غرام .. طبعا هذا مثال ومو مقياس
شوف هاي الصورة بالرابط رح تقربلك الفكرة

شلون أحافظ على الفلمنت؟

أهم شي بعد ما تشتري الفلمنت انو ما تفتحه من الكيس المفرغ من الهوا اذا ما رح تستخدمه.. حتى لا يتلف..

اشتريلك حافظة بلاستيكية كبيرة مال اكل واحفظ الفلمنت بيها واذا كان الغطا مالتها مو محكم.. يعني يعبر هوا تكدر تخلي على إطار الغطا شريط الفوم اللاصق اللي يبيعوه بالأنشائيات واللي يستخدموه للابواب والشبابيك.. .واذا ما كدرت توفر حافظة.. خليه باكياس محكمة الغلق.. وبشكل عام حافظ عليه بمكان جاف.

احتفظ باكياس السيليكا الصغيرة اللي تجي ويه الفلمنت وخليها بهاي الحافظة حتى تمتص الرطوبة قدر الإمكان..

لا تترك الفلمنت على الطابعة فتره طويلة وتجي تطبع بيه مباشرة.. جونا مترب وذرات الغبار اللي تصير على سطح الفلمنت تدخل للنوزل وتغلقه وتسوي مشاكل بالطباعة.. نظف الفلمنت من الغبار بمنفاخ او اطبع القطعة اللي يخلون بيها قطن او اسفنج حتى تنظف الفلمنت قبل ما يدخل للاكسترودر... انتبه.. لا تخلي قطن او كلينكس بشكل مباشر على الفلمنت لان مرات يروح للاكسترودر وينسحب ويه الفلمنت ويسوي مشاكل.. رابط ملف قطعة فلتر الغبار

لا تغسل الفلمنت ابدا ..

اكو اجهزة تجفف الفلمنت وتمتص الرطوبة منه، تقدر تشتريها من خلال متجرنا على الرابط.

أكو أكياس خاصة لحفظ الفلمنت أيضا، بيها إمكانية حسب الهواء، تقدر تشتريها من خلال الرابط

من تكمل من استخدام الفلمنت وتريد تخزنه.. تأكد انو بداية الفلمنت تخليها بالمكان المخصص الها بالبكرة.. لان اذا فلتت احتمال يعبر من تحت لفة ثانية ويحشر عندك بالطباعة...

شنو نوع الفلمنت اللي احتاج أشتريه لطابعتي ثلاثية الأبعاد؟

السؤال الاول: شنو الغرض اللي احتاجه بالفلمنت؟

آني هاوي وأريد اتعلم واطبع هاي الشغلات الحلوة بالانترنت وشغلات اريد اصممها واطبعها.. تماثيل ومجسمات شخصيات وعمارات ومعالم وأشياء فنية، تمام بما انك هاوي وتحب تتعلم فلازم تعرف انو نوع الفلمنت المناسب الك هو ال PLA واللي هو الاكثر شهرة وانتشار بين انواع الفلمنت.. مرح اترجم رموز الحروف مالته لان ما اعرفها وما رح تستفاد منها... يمتاز هذا الفلمنت بسهولة طباعته.. والسهولة هنا يعني ينطبع بحرارة ١٩٠ الى ٢٢٠ درجة ويتلصق بسهولة مع بعضه وعلى المنصة واحيانا ما يحتاج منصة حرارية.. يعني منصة باردة هم يلتصق عليها.. وبعد يمتاز بتعدد الوانه واشكاله.. يعني بيه الوان اعتيادية هواية.. والوان بيها لمعان والوان بيها تدرجات وخشبي وشفاف ويتغير بالحرارة ويضوي بالظلمة وووو مايخلصن.. هذا غير انو سعره مناسب وبالمتداول.. يعني بشكل عام مناسب للمبتدئين. بس هو كل حلو ما يكمل..ليش؟ لان من عيوبه انو ما يتحمل درجات حرارة الجو العالية.. يعني اذا تعوفه بالسيارة بشمسنا الحلوة تجي تلكاه متشوه ومايع... وبعد من عيوبه انو هشاشته اعلى من باقي الانواع... لانو مصنوع من مواد عضوية .. على الاغلب طحين الذرة (حتى نحافظ على البيئة ويكون آمن بالإستخدام) وبمرور الزمن يتاثر بالرطوبة وتزيد هشاشته... يعني لاتفكر تطبع اجزاء ميكانيكة او مساند رفوف او أجزاء تتحمل اجهادات بهذا الفلمنت... هذا النوع من البلاستك يجي باكياس محكمة الغلق ومفرغة من الهواء حتى لا يتعرض للرطوبة ويقصر عمره.. وانت هم من تفتحه وتتركه بلا استخدام لازم تحافظ عليه بمكان جاف مثلا تخليه بحافظه محكمة الغلق او كيس بلاستك غير نافذ..

اني مهندس وهاوي مشاريع واحب سوالف ال DIY واريد اطبع اجزاء ميكانيكة وتعديلات منزلية ودعافيس لسيارتي، بهيجي حالة رح تحتاج فلمنت بمواصفات اعلى من ال PLA خلي نشوف شنو متوفر وشنو مميزاته وشنو عيوبه، عدنا ال ABS وهو ببساطة البلاستك اللي يتحمل حرارة جو اعلى يعني تكدر تطبع بيه الاجزاء اللي تريد تخليها بالسيارة او على رازونة شباك البيت بلا ما تموع وتتشوه.. الحلو بهذا البلاستك سعره بالعادة اقل من ال PLA وهم متوفر بعدة الوان.. ويمتاز بأمكانية صقله من خلال معالجته بالاسيتون.. لانو يتفاعل وياه.. بحيث نكدر نخفي خطوط الطبقات ونحصل على سطوح صقيله.. هذا الفلمنت هشاشته قريبة من ال PLA وعيبه هو بصعوبة طباعته نوعا ما لان درجة انصهاره قريبة من درجة تصلبه.. يعني احيانا اول ما يطلع من النوزل يتصلب قبل ما يلتصق على الطبقة اللي تحته.. لذلك لازم يكون الجو المحيط بالطابعة حار.. بالعادة يغلفون الطابعة ب enclosure واللي هي علبة تكدر انت تصنعها من الاكريليك الشفاف او حتى من الكارتون حتى تحافظ على حرارة الجو المحيط.. هذا البلاستك يحتاج حرارة نوزل بين ٢٢٠ الى ٢٤٠ درجة والمنصة بين ٨٠ الى ١٠٠ درجة، عدنا كذلك ال PETG هذا النوع من البلاستك من عائلة ال PET وهو البلاستك اللي يصنعون منه قناني المي البلاستيكية وعلب الشامبو... يمتاز بتحمله العالي للاجهادات بحيث تكدر تصنع بيه اجزاء ميكانيكة وما تخاف عليها تنكسر بعد مرور فترة من الزمن... سهل بالطباعة يحتاج حرارة نوزل بين ٢٠٠ الى ٢٣٠ درجة وحرارة منصة بين ٦٠ الى ٨٠ درجة.. كمية الالوان المتوفرة بيه اقل وجماليتها مو مثل ال PLA .. شخصيا لاحظت بيها درجة شفافية بسيطة..

اريد اطبع كفرات موبايلات واكتب عليها اسمي واخلي عليها تصاميمي.. او اسوي تايرات للسيارات المصغرة، رح تحتاج بلاستك مرن واللي يسموه TPU يمتاز بمرونته بشكل عام بس درجة المرونة تعتمد حسب الشركة المصنعة .. لا تتصور رح يكون بلاستيك مطاطي ولا رح يكون صلب.. بس هو بيه درجة مرونة.. صعب شوية بالطباعة بسبب مرونته ويحتاج تعديلات باعدادات الطباعة.. مشكلته انو الاكسترودر من يسحب الفلمنت او اللي نسميه retraction الفلمنت يحشر بداخله ويسوي مشاكل فوحدة من الحلول انو نطفي الريتراكشن ولازم يكون النموذج مالتنا قدر الامكان ما بيه travel هواية واللي هو حركة النوزل من مكان لمكان بدون طباعة حتى لا يصير عدنا شعيرات.. طبعا هذا شرح سريع تكدر تحصل ملعومات اكثر بالانترنت .. واكو طابعات تكون الطباعة بيه اسهل من غيرها، هذا البلاستك مو كلش مناسب لصناعة الأختام لان مثل ما ذكرت انو مرونته مو مثل المطاط اللي يصنعون منه الاختام، يحتاج حرارة بين ٢٠٠ الى ٢٢٠ درجة وحرارة المنصة هم تعتمد على نوع المنصة... نكدر نكول بين ٥٠ الى ٧٠ درجة..

اريد اطبع اجزاء ميكانيكية وعليها ضغط واحتكاك يولد حرارة... واحد من الانواع المشهورة بقوتها وتحملها للحرارة هو ال PA او النايلون.. هذا الفلمنت يجمع خصائص ال PETG و ال ABS رح يوفر الصلابة وتحمل الحرارة اللي تحتاجها بس بالمقابل رح يحتاج حرارة نوزل بين ٢٤٠ الى ٢٦٠ درجة وحرارة منصة بين ٨٠ الى ١٠٠ درجة.. وما يتوفر بالوان هواية.. تكدر تسوي منه مساند رفوف او اي قطعة منزلية تحتاج تحمل اجهاد. صعوبته مثل ال ABS اذا مو اصعب..

اكو بعد هواية انواع من الفلمنت والي كل واحد اله استخدامات محددة.. رح نتكلم على قسم منهم باختصار

كاربون فايبر.. هو PLA يمتاز بتحمل قوة أعلى بس مو كلش هواية والمميز بيه انو دقته عالية بالطباعة وينطي جمالية للنموذج
موصل الكهرباء.. هذا يجي PLA او ABS ومناسب للمشاريع الصغيرة والاغراض التعليمية
الـ HIPS..وهو بلاستك خاص يذوب بمواد حامضية يستخدموه بطباعة المساند بالطابعات متعددة الالوان حتى يتخلصون من المسند بسهولة وبدون ما ياثر على جمالية النموذج..
ومثله ال PVA بس هذا يذوب بالمي ويستخدم لنفس الغرض..

شنو هي المادة المستخدمة بالطباعة ثلاثية الأبعاد؟

مادة الطباعة اللي تستخدمها الطابعة هي نوع من أنواع البلاستك يسموه Filament يجي على شكل رولات من خيوط بلاستيكية... كل رولة لون محدد .. وكل رولة وزنها 1 كيلوغرام ..

الفلمنت يجي بعدة أنواع مثل:
PLA الإعتيادي الصديق للبيئة والمصنوع من طحين الذرة
ABS مقاوم للحرارة وممكن معالجته بعد الطباعة بالاسيتون حتى ينطي مظهر صقيل
PETG يمتاز بقوته وتحمله للإجهادات
TPU مرن ومناسب لطباعة الإطارات
وغيرها من الأنواع المختلفة والمتنوعة تقدرون تشوفوها بمتجرنا على الرابط

Uncategorized

أوو نعتذر .. ما طلع شي ويانا بالبحث .. جرب شي ثاني

سلة التسوق

title

مركز المساعدة والمعلومات